Pulitika latta piman – last part

Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan, kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy kulom tayo. Kumusta, mag-an kayo amin nga awan labasna. Nagasat nga aldaw kadakayo nga awan malabsan, sukimi.

Buenas dias eh Paquito Diaz este, naimbag nga oras yo amin nga awan malabsan kakayong, kaarruba ken uray dakayo a kagurgura este manggurgura kaniak. Hahaha, anian, Inang ko aya. Sapay la koma napia kayo amin a sukimi ti ABN ken dikay koma maum-uma a mangbasa kadagiti putahe nga inkam idasdasar iti daytoy a pagiwarnak tayo. Ken sapay la koma ta makaibinglay kami iti impormasion ken sangkatipping nga adal babaen kadagitoy nga inkam immaldit. Ta awan sabali a panggep wenno rantami no saan a mangliwliwa, mangted impormasion ken adal. Kas kadagiti naglabas a topikotayo, awan koma ti masasair, awan koma ti matugkik ti riknana kadagiti inkam inlanad kadagitoy a sinuratmi ngem ketdi isuda koma ti mangriing rikna kadatayo. Umdas koma a pagpampanunotan tayo ta no dikam agbiddut ket pasig a kinapudno amin ta naibasar met laeng iti kapanunotan ken panagpalpaliiw tayo kadagiti mapaspasamak iti aglawlaw tayo.

Kunada ngarud batu-bato sa langit ang tamaan di magagalit ngem saan kailian, no mapuntaanka, naspak ti rayaraya…bukol. Adda pay pagsasao a kunana, no asino’t agsili-isu’t magasangan. Puera delos buenos a kunada, adda no di man adu kadagiti kandidato itan ti parparawpaw ti panggepda a panagserbi. Dayta ketdi ti mapaliiw tayo, iti bukodmi a pammaliiw daytoy kakayong, saanmi nga ammo kadakayo. Adda pay dagiti kandidato kunak manen, no tiempo ti kampania kumare kas kada kumpareda amin, kabsat amin a suli no agsaoda ngem inton nakatugawdan, saanka a basta makastrek iti opisinada no awan appointmentmo a kunada. Saan laeng a dayta, didanto payen pulos masango ti agpasiar kadagiti luglugaryo. Saan a rason tay kunada a busy da ta no maminsan, dimo pay makita ti mumukatanda iti opisinada. Manmanu diay uray nalpasen ti eleksion, nagrigatda payen nga awisen no adda pasken a pangawisam kadakuada kas guest speaker, porke napno ti schedule da ken ania pay dita. Nupay kasta adda gayyemtayo a maysa laeng nga awagmo kenkuana nga uray awan pormal nga imbitasion no adda wayana, umay nga umay. Ken manipud nakatugaw nga agingga ita a dandani eleksion, sinursorna latta dagiti amin a barangay. Malaksid nga agayaman, mapanna damagen no ania ti problemada ta isu’t ipaayanna iti priority concern a kunada. Kasta, ah.

Ala, kakayongmi ida, kas nakunami…nanakman tayon, ammotayo metten ti kalidad dagiti kandidato iti lugar tayo nangruna kadagiti agsubli-subli la unay nga uray awan met naar-aramidanda. Ta dagiti karida iti immun-una a nagpailayonda, naitayab met ti kali dagita a kari, naimbag koma no diay putahe a kare-kare ta nasudi ti nanam na, hehehe.

Gibusan tayo pay laeng dagitoy a topiko ta makapasakit laeng iti ulo. Adu dagiti kayatmi nga idanun kadakayo a kapanunotan iti nagduduma a pakaseknan tunggal maysa kadatayo ngem yantangay overtime tayo manen, awisendakayo ngarud a mangbukitkit to manen iti sumaruno nga isyu ti ABN. Kastan ket mag-an kayo amin nga awan labasna, ti Apo koma ti adda kadatayo a sangapada. Kasta pay kakayong ta ne…ala, aglisi ka man dita Atong, ania man ta isensenyasmon. Anunsio iti hueteng… agingga ita, dayta pay laeng ti ubram. Ala, ala, kalagem man ngarud tay opisyal a bullilikong hehehe. Kasta pay ket ne nakaadu tayo manen, babayoo, tsup tsup muahmuah.