Narvacan, maysa kadagiti kabaknangan nga ili iti Pilipinas

Headlines

NARVACAN, ILOCOS SUR – Ipagpanpannakkel ti gobierno lokal ti pannakairaman ti ili ti Narvacan iti Top 10 Richest Municipalities in the Philippines idi 2017.

Ibilbilang daytoy ti lokal a gobierno kas dakkel a balligi nangruna ta damdamo a nairaman ti Narvacan iti top 10 kadagiti kababaknangan nga ili.

Iti economic asset nga aggatad ti P1.627 bilion, adda iti maika-9 a puesto ti Narvacan manipud iti 1,489 nga il-ili iti entiro a pagilian. Daytoy ket maibasar iti 2017 Annual Financial Report on Local Government Units (LGUs) nga inruar ti Commission on Audit (COA) idi Oktubre.

Kinuna ni Mayor Zuriel Zaragoza, babaen ti pannakipatang iti maysa nga istasion ti radio, a pammadayaw daytoy iti ili ken pammaneknek ti nasayaat a panangituray ti lokal a gobierno ti Narvacan.

Impangruna ti mayor a nagun-od ti ili ti nakuna a pammadayao gapu iti nasayaat a pannakamanehar dagiti pundo.

Kabayatanna, naala ti Cainta ti umuna a puesto iti aset nga aggatad ti P3.988 bilion; maikadua ti Sual (probinsia ti Pangasinan –  P2.529 bilion; sumaruno ti Limay (Bataan) – P2.426 bilion; Sto Tomas (Batangas) – P2.15 bilion; Binangonan (Rizal) – P2.106 bilion; Mariveles (Bataan) – P2.091 bilion; Tanay (Rizal) – P1.793 bilion; Carmona (Cavite) – P1.659 bilion; ken maika-10 ti Silang (Cavite) – P1.598 bilion.

Kadagiti siudad, kabaknangan ti Quezon City – P68.33 bilion; sinaruno ti Manila – P38.677 bilion; Cebu City – P33.86 bilion; Pasig – P33.703 bilion; Taguig – P19.641 bilion; Caloocan – P17.011 bilion; Pasay – P16.662 bilion; Davao City – P13.182 bilion; ken maika-10 ti Calamba – P12.414 bilion.

Top 10 kadagiti kababaknangan a probinsia ti Cebu – P34.139 bilion; Compostela Valley – P18.95 bilion; Batangas – P15.568 bilion; Rizal – P14.02 bilion; Negros Occidental – P12.889 bilion; Zambales – P10.455 bilion; Bulacan – P10.451 bilion; Palawan – P10.159 bilion; Iloilo – P10.045 bilion; ken Pampanga – P9.53 bilion. ABN