LU, nakipaset iti 13th Nakem International Conference

Headlines

SIUDAD TI BAGUIO – Iti agtultuloy a panagpursigi tapno masalimetmetan ti kannawidan ken mapatibker ti pannakausar ti tawid a pagsasao nga Iloko, dinar-ayan ti probinsial a gobierno ti La Union ti 13th Nakem International Conference idi Mayo 24 inggana 26, 2018 iti Center for Culture and Arts ti Saint Louis University (SLU), ditoy siudad.

Ti tallo nga aldaw a komperensia ket nakipasetan dagiti nasurok 100 a propesional ken academic researchers a pakaibilangan dagiti naggapu pay iti sabali a pagilian.

Iti mensahe ni Rev. Fr. Gilbert B. Sales, presidente ti SLU, kabayatan ti panglukat a programa, kinunana a babaen ti Nakem Conference, maabbukay ti “nakem” wenno puot tapno utoben dagiti moral a pagibasaran ti kalidad ti aramid (ethical conduct).

Inlawlawag met ni Dr. Aurelio S. Agcaoili, presidente ti Nakem USA, a kasapulan a sosteneren ti tallo a kangrunaan nga issue a mangmangted iti nabagas a panagbiag iti nagduduma a komunidad ken pagilian iti lubong: linguistic diversity, cultural democracy, ken liberation education.

Ti libro ni Agcaoili a “Zona Zero/Zone Zero” ken libro ni Dr. Sonja A. Chan a “Dear Heart” ket nairusat kagiddan ti libro a “Pakasaritaan: Story in History, History as Story and Liberation Education” kas pammadayaw kenni Dr. Julius Bajet Soria ti Nakem USA a pimmusay idi 2016.

Kinuna ti officer in charge ti Commission on Higher Education (CHED) Dr. J. Prospero E. De Vera III a nagserbi kas guest speaker, ti “Nakem” ket maysa a tignay, panangiparang ti bagi ken kinatao ti maysa a tao.

Naisayangkat kadagiti simmaruno nga aldaw ti komperensia ti Plenary ken Parallel Sessions. Iti plenary sessions, imbinglay dagiti propesional ti adal ken kapadasanda maipapan iti kultura ti Ilokano a mangsuksukog iti kinasiasino ken nakem ti maysa a tao. Nagserbi kas speakers da Dr. Jimmy Fong, Dr. Jeofrey M. Almazan ken Dr. Raymundo D. Rovillos. Bayat nga iti parallel sessions ket naiparang ti Educational and Linguistic Foundations, Research, Experiences and Best Practices; Language and Literature Education, Arts, Sports, Sciences and Related Topics; ken Local History, Culture and Society in Luzon, Visayas and Mindanao.

Kas paset ti komperensia, naluktan ti Amianan Studies Corner iti SLU Library babaen ti maysa a ribbon cutting ceremony.

Maisayangkat ti sumaruno a Nakem Conference iti Polytechnic University of the Philippines (PUP), Manila. PITO-PGLU / ABN