Breaking News
     |  | 

    Headlines

    LU kas Surf Capital ti Norte, aprubado ti Kongreso

    LA UNION – Aprubado iti maikatlo ken maudi a panagbasa ken naipasa iti Senado ti singasing a linteg a mangitan-ay iti La Union kas “Surfing Capital of the North.”

    Ti House Bill 6683, a kangrunaan a pinutar ni Rep. Vini Nola Ortega ti ABONO partylist, ket naaaramid tapno maitandudo ti kinapintas ken kinangayed dagiti baybay iti La Union ken mapapigsa pay ti pannakaammo dagiti umili iti sports, salun-at ken panangilala iti nakaparsuaan.

    Babaen ti HB 6683, ti Department of Tourism (DOT) ken sabali pay a mayannatup nga ahensia ti mangiyuna tapno agdur-as ti turismo ti probinsia. Iti las-ud ti maysa a tawen kalpasan a maaprubaran ti singasing a linteg, ti DOT, iti pannakitinnulong ti Department of Public Works and Highways (DPWH), Department of Environment and Natural Resources (DENR), ken dadduma pay nga ahensia, ket kasapulan a mangisagana ti maysa a tourism development plan a pakairamanan ti panangbangon, panangikabil, ken panangmentenar kadagiti pasilidad ken imprastraktura a kasapulan tapno maiparangarang dagiti baybay ken surfing activities iti probinsia.

    Kasapulan a mairaman iti tourism development plan ti kinatalged dagiti turista.

    Ti DOT ken kadwa na nga ahensia ti mangipatungpal iti development plan, mangitipon ti plano iti tinawen a tourism development programs daytoy, ken mangiraman iti nasao a plano iti tinawen a General Appropriations Act (GAA) ken iti pondo a maur-urnong ti DOT.

    Iti kanito a maipakat ti singasing a linteg, kasapulan nga iti las-ud ti 90 aldaw ket mangputar ti DOT a naikonsulta iti lokal a gobierno ti La Union kadagiti pagrebbengan ken regulasyon iti panangipatungpal daytoy kas linteg.

    Ti HB 6683 ket kadwa a pinutar da committee on appropriations chairman Rep. Karlo Alexei Nograles ti Davao City 1st District, nga isu met laeng ti nag-isponsor iti pannakaapruba daytoy iti plenario, ken ni committee on tourism chairperson Rep. Lucy Torres-Gomez ti 4th District, Leyte. ABN

    ABOUT THE AUTHOR