Breaking News
     |  |  | 

    Opinion You and Me

    Black Nazarene at ang Translacion

    Isang malaking relihiyosong selebrasyon ang Pista ng Quiapo o ang kilala bilang Fiesta ng Itim na Nazareno. Ang ‘Traslacion’ ay salitang Espanyol na ang ibig sabihin ay “paglipat”. Inilalagay ang imahen sa Luneta at ito ay dadalhin at ililipat sa simbahan ng Quiapo sa isang mahabang prusisyon. Ito ang Traslacion. Ang Itim na Nazareno na kilala din bilang Poong Hesus Nazareno ay ang imahen ni Hesus na may pasan na Krus na nakalagak sa simbahan ng Quiapo sa Maynila mula pa noong taong 1787. Ito ay gawa sa maitim na kahoy at nakabihis ng ‘maroon’ na bata. Sinasabing nasunog ito sa galyon na sinasakyan nito mula sa Mexico habang papunta ng Maynila pero walang katiyakan kung bakit ito ay nagkulay itim. Noon namang World War II ay naputol ang totoong kamay nito sa kanan at ngayon ay nakatago sa loob ng simbahan. Ang imahen ng Nazareno ay naisalba sa iba’t-ibang kalamidad at digmaan tulad ng nasunog ang simbahan ng Quiapo noong 1791 at 1929, lindol noong 1645 at 1863 at ang pambobomba sa Maynila noong 1945 sa panahon ng digmaan. Noong 1998, isang replika ng orihinal na imahen ang ipinarada sa Traslacion dahil sa pinsalang nakamit ng orihinal na imahen. At magmula noon, ginamit na ito sa mga prusisyon at ang orihinal ay nanatiling nakalagak sa loob ng simbahan kasama ng maliliit nitong replica.

    Ang mga deboto ng Nazareno sa Quiapo ay naghahanda bago pa man sumapit ang ika-9 ng Enero dahil ika-7 pa lang ay mayroon nang prusisyon ng replica ng Itim na Nazareno at napakarami na rin ang sumasama dito at sa mismong araw ng pista ay mas lalong marami pa ang sumasama sa prusisyon na mangggagaling sa Luneta hanggang sa simbahan ng Quiapo. Nagsisimula ito ng madaling-araw at karaniwang nakakarating sa simbahan ng gabi na dahil sa dami ng taong kasama sa Traslacion na sanhi ng bagal ng pag-usad ng andas nito. Ang milyong deboto nito ay tinitiis ang hirap at sakit ng katawan, makalapit lamang dito o makasama lang sa traslacion.

    Sa daan-daang taon na nakalipas ay nalampasan ng imahen na ito ang hindi mabilang na delubyo at problema. Ang kanyang katatagan at lakas sa pagdaan ng panahon at ang hiwagang nakapalibot dito ang siyang nagdadala ng milyon-milyong mga deboto bawat taon sa Quiapo para sa Pista ng Itim na Nazareno at Traslacion. Sa iba ito ay isang uri ng panatisismo at bulag na pagsamba sa isang rebulto pero ang mga deboto ay salungat ang pinapakita sa puna ng mga kritiko at nananalig sa milagro nito.

    ABOUT THE AUTHOR