Bagyo manen

Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan, kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy kulom tayo. Kumusta, mag-an kayo amin nga awan labasna. Nagasat nga aldaw kadakayo nga awan malabsan, sukimi.

Ay, ina aya, bagyo manen kailian. Ania ngay itan, di pay la nakalung-aw dagiti nagbalin a biktima ken adu pay ti dida na-retrieve a biktima a nagaburan nangruna iti probinsia ti Benguet. Ita, dimteng manen ni bagyo Rosita, segun iti damag adu manen ti nadadael a sanikua iti  paset na ti Isabela. Tumapogen ti bulan ti Nobiembre ngem adda pay la bagyona kailian, naimbag la ketdin ta biddut sa ti forecast da ta saan unay a napigsa ti dimmalapus a bagyona.

Dakkelen ti nagbalbaliwan ti panawen ken paniempona, adda man ketdi nadlawko ken napaliiwko, sipud addaak iti siudad ti saleng manipud dekada 70, no saanak nga agbiddut, namindua wenno namitlo laeng a nagawidak iti kaaldawan ti piesta dagiti natay. Kayatna a sawen, iti las-ud ti nasurok nga uppat a dekada addaak ditoy siudad ti Baguio a no sadino ket ditoy ti nakasapulak iti panggedan ken ditoy metten ti pagnanaedan ti pamiliak. Ngem, iti las-ud dayta a kaaddak ditoy siudad ti saleng, tinawen ketdi a tunggal madanun daytoy a petsa, uno ti Nobiembre, agtodo…ngem, ita bagyo met ti dimteng ngem naimbag laengen ta limmabasen ngem seguro pitak la ketdi manen iti sementerio.

Talaga nga adun ti nagbalbaliwan ti panawen kailian, kangrunaan ti kibara ti panawen. Dagiti nagduduma a dimdimteng a didigra kadatayo, bunga amin daytoy ti kinaranggas ti tao iti nakaparsuaan ngem awan latta, saantayo man laeng a mangaramid iti  pamuspusan tapno ma-restore a makuna ti kinangayed na. Ti maysa a madlawko ketdi, kasla nga awan man laeng ti addang dagiti opisyal ti gobierno maipapan iti daytoy. Adu a damag maipapan iti proyekto ti gobierno para iti panagdur-as ken panagaramid iti kalkalsada kas kada paspasdek ti gobierno ngem kasla nga awan proyekto da maipapan iti pannakaisubli ti kinangayed ti nakaparsuaan kas koma iti tree planting ken dadduma pay.

Idi, naglawa ti kabakiran a paset ti pagilian ngem, in-inut a napukaw, nalukasan dagiti bambantay kadagiti rumiet a kabakiran, narames a kunada no balasang koma, nalabes ti kinadamsak ti tao gapu laeng iti bukod a gagem. Adda pay dagiti damag idi a mismo a dagiti opisyal ti adda iti likudan ti illegal logging ken uray sa pay iti panagminas. Hay naku kayong aya…

Iti agdama, gapu iti napasamak a panagreggaay a nakatayan ti adu a lumugar, naikeddeng ti ahensia ti gobierno a maisardeng ti panagminas nangruna iti ibagbagada nga open pit mining iti nasao a lugar. Adu dagiti nangkontra wenno nangkondinar iti daytoy nga addang ti gobierno ta segun kadagiti agindeg awan met sabali a panggedanda, kayatna a sawen kasla nga awan aniamanna ti pannakatay ti adu a kailianda. Hay naku…

Sus nalpas ti ani, anak ti tukling a balo…kasta pay kakayong ta ne overtime tayo manen… ala, aglisi ka man dita Atong. Ania man ta isensenyasmon, anunsio iti hueteng…agingga ita, dayta pay laeng ti ubram. Ala, ala, kalagem man ngarud tay opisyal a kalbo hahahaha. Kasta pay ket ne, nakaadu tayo manen. Babayoo, tsup tsup muahmuah.