Breaking News
     |  |  | 

    Opinion Sirmata ken Tagtagainep ni Mang Gusting

    ASEAN Summit wenno Asyong Sa Met!

    Hellooo, hellooo, naimbag nga oras kadatayo amin kakailian. Addakam manen nga umay maki-abrasa ken makinnistoria ken makinnisem kadakayo babaen iti ABN. Sapay la koma ta pia ken karadkad latta ti adda kadakayo a sangbayan manen daytoy kolum tayo ket makaipaay kami manen iti ray-aw ken impormasion kadagiti mapaspasamak iti aglawlaw tayo. Ngem koma ket uray kasanu kina-busy ken kinarigat ti panagbiag kadagiti pada a mangur-kuranges a kunada, ditay latta liplipatan wenno liwayan ti agyaman iti Dios a mannakabalin amin kadagiti paraburna kadatayo. Kunada ngarud, bilangen tayo dagiti parabor ti Apo kadatayo saan ketdi a dagiti parikut a sumangbay wenno pannakapaay tayo.

    Daytoy man pay kayong ta adda istoryaek kenka tapno agkatawa kay met bassit.

    Iti panagsarsarita dagiti agassawa a Sianong ken Sianang a nalabsantayo, kastoy man ti intay natimud kadakuada…

    Sianong: Sorry, Baket… pakawanennak koma, nagbasolak kenka.
    Sianang: Ania ti basolmo Sianong lakay… ibagam ta maawatanka.
    Sianong: Naki-innayatak ken kumadrem, binayadak iti lima gasut a pesos.
    Sianang: [makaunget] Laglag a laklakayan…
    Sianong: Ha, kua…please metten, a. Sorry, pakawanenakon.
    Sianang: No dika ket langgong, ah…apay a nagbayadka…inka sublien tay imbayadmo.
    Sianong: Ania, kua…bay-amon ah. Lima gasut met laeng.
    Sianang: Langgongka ketdi a napeklan, nagkuna nga agbayadka ket iliblibrek ni Kumparem!
    Sianong: [mulagat] Ania…!

    Wahaaa, hahahaha, patalastas laeng met Kayong Angkuan ta bareng makakatawa ka met, ken istoryaem to no agiinum kayo.

    ASEAN Summit, kas mabasa kadagiti news paper, mangngeg kadagiti damdamag iti radio ken mabuya iti TV news. Adu dagiti natalantan, adda met dagiti negatibo ken positibo a nakuna dagiti nagduduma a lider a timmabuno. Adda ka dita a nagkari ti presidente ti Amerika iti 2M US dolyares sa daydiay wenno pesos, sus matikawak no kasta kadadakkel ti gatad ti kuarta ti mapagsasaritaan ta alergy-kak, para kanu daytoy iti rehabilitasyon ti Marawi City. Ngem ti makunami, ASEAN Summit ngata a pakairanudan wenno Asyong Sa Met, hahaha, kaloka ania Kayong. Kas intay nabuya iti TV news, nagkari ti presidente ti America iti tulong para iti Marawi. Kas met laeng iti China, nagkari iti tulong para iti pannakaaramid ti dua a rangtay iti nasao met laeng a siudad a no sadino ket nakapasamakan ti agarup lima bulan a ranget iti nagbaetan dagiti rebelde a nangsakup iti siudad ngem naparmek met laeng ida ti armada ti pagilian.

    Ania kadi ti makunayo iti daytoy Kayong, no bilang awaten ni Presidente Digong dagitoy a tulong. No dakami, awatenna man, agpada laeng dayta. Agpada a nasayaat ta para kadagiti kakabsat idiay a lugar. Basta maaramat la ketdi para iti pagsayaatanda saan ket a mapan man laengen iti dadakkel a bulsa dagiti —hay naku Kayong, makabasolta manen. Ta no malagipko, nagdakkel ti donasyon idi a naawat ti pagilian idi nadalapus ti napigsa a bagio ti Tacloban City. Daytoy ket para iti rehabilitasyon ti siudad ken pannakaipaay iti pagtaengan dagiti kakabsat idiay ngem—ayanna ngay. Isu a no donasyon kunada, agarigengen toy riknakon. Isu a kunak, nasayaat laeng no matungpal amin ken agbanag a nasayaat ti resulta ti ASEAN Summit saan ketdi nga Asyong Sa Met, hahahaha…naalam, Kayong?

    Ne, ne, ne, Kakayong naimasantayo manen a kunak, isu a baliwantayto manen, a. Opsss, aglisika man met iti pagnaak sika Atong. Addaka manen a kunak, pasalsali ka a kanayon. Ania manen ti masapulmo aya? Makalag a numero? Ala man laengen…sige, kalagem man tay presidente a puraw, hahahaah, ta balatuannakto no mangabakka. Apowww, dakesen…ni Sofing dayta sumungaden nga adda awitna a tampong. Insurotnansa metten ti gamigamko, dakesen. Pagtalawendak sa metten pare Jun. Babayooo, tsuptsup muahmuahhh.