|  | 

Headlines

Seal of Good Local Governance 2017, inawat ti LU

SIUDAD TI SAN FERNANDO, LA UNION – Napadayawan ti probinsial a gobierno ti La Union (PGLU) a kadwa ti 27 pay a probinsia iti pagilian a nangawat iti Seal of Good Local Governance (SGLG) kabayatan ti 2017 SGLG Awarding Ceremony idi Nobiembre 27, 2017 sadiay Manila Hotel, Tent City, Ermita, Manila.

Malaksid kadagiti 28 a probinsia, nakaawat met ti pammadayaw ti 61 siudad ken 359 munisipalidad ti pagilian ita a tawen. Pakairamanan dagiti napadayawan ti siyam manipud iti 20 local government units ti La Union a dakkel ti nagdur-asanna manipud iti lima nga LGUs idi napalabas a tawen.

Pakaibilangan daytoy dagiti minisipalidad ti Bacnotan, Bangar ken San Gabriel ti umuna a distrito ti probinsia ken Bauang, Burgos, Caba, Pugo, Santo Tomas ken Tubao iti maikadwa a distrito.

Ti awan sarday a panangipangruna ti PGLU iti panangidaulo ni Gov. Francisco Emmanuel “Pacoy” R. Ortega III iti “transformative governance” ti nanggutugot iti Department of the Interior and Local Government (DILG) a padayawan ti probinsia.

Ti pannakairaman ti La Union iti listaan dagiti awardees iti dua a nagsaruno a tawen ket gapu iti panagtinnulong ti ehekutibo ken lehislatibo a sanga ti PGLU ken ti natibker a partnership iti government ken non-government organizations, pribado a sekta ken dadduma pay nga stakeholders.

Ti SGLG ket maysa a pammigbig iti kinatulnog ken kababalin dagiti local government units babaen kadagiti basaran ti good local governance kas ti financial administration, turismo, sining ken kannawidan, panagsagana manipud didigra, kappia ken urnos, social protection, business friendliness ken competitiveness, ken environmental management

Ti awarding ceremony ita a tawen ket natemaan ti “Gobyernong may malasakit tungo sa pagbabago at patuloy na pag-unlad.” PITO-LU / ABN

ABOUT THE AUTHOR