|  |  | 

Opinion Sirmata ken Tagtagainep ni Mang Gusting

Panagbabagyo, panagnenepnep manen

Hellooo, hellooo. Naimbag nga oras kadatayo amin kakailian, addakam manen nga umay maki-abrasa ken makinnistoria kadakayo babaen iti ABN. Naimbag nga oras kadakayo amin nga awan malabusan este malabsan kunami koma kailian. Kayatdakayo man a kumustaen kadagiti nadayaw a luglugar yo. Dikay met laeng dinalapus iti husto ni Gorio? Bayat a masursurat daytoy kolum tayo, kasta unay a bayakabakna ditoy batugmi a langit…

Sapay la koma ta saankayo unay a napakaruan iti namsaakan ni Gorio,kailian. Iti napalabas a kolum tayo nadakamat tayo ti kina-handa wenno nakasagana kadin dagiti ahensia ti gobierno nga akin-sakup no dumteng ti disaster, koma daytoy ti maysa kadagiti prioridad ti gobierno saan ketdi a no ania la ditan. Koma, Kayong Angkuan, tunggal barangay adda naituding nga evacuation center building dagitoy ta saan ket a dagiti classrooms. Ta di mataktak wenno madisturbo ti panagadal dagiti ub-ubbing. Ngem, saanko man nga ammo ta kasla awan sa ti makapanunot kadagiti opisyal ti gobiermo daytoy.

Wen, Kayong Angkuan, ipangpangruna koma ti gobierno daytoy a programa nangruna kadagiti kailian tayo nga agnanaed kadagiti aplaya ken bakras ti bambantay nangruna iti siudad ti saleng. Ta uray ania met ti ibagbaga ti gobierno ti siudad a dida agpatakder kadagiti bakbakras, awan latta met ta ania ngarud. Isapul met diay tao ti pagsayaatanna. Eskuat ditoy eskuat idiay ta ania ngarud. Narigat unay ti biag ket nagngina met ngarud ti abang. No addaka ditoy siudad, dayta ti maysa kadagiti makuna a karigatan ti paset ti biag no agab-abangka. Nagbayadka ita, no bigat adda man utang mon. Isu a dagiti dadduma ultimo titulado a daga no nakatiwang-wang, sige, sadanto agriri no ma-demolish da.

Kas ita manen, Kayong Angkuan ta panagbabagyo manen, awan manen pasinatnatna a todo no kumaro, segurado nga adda man margaayen ket naimbag no awan mairaman a balay ket awan met maipatli a biag kas koma iti napasamak iti maysa a barangay iti La Trinidad, Benguet manun a tawen ti napalabas…dandani maysa a barangay ti nagaburan ta nagreggaay ti bantay. Nakaal-alingget dagiti kastoy a pagteng Kayong. Ngem, ti makunatayo, akimbasol ngata? Basol ngata ti Apo? Wenno datayo met laeng a tattao ti gapuna no apay nga adda dagiti kakastoy a didigra, kas koma iti reggaay? Ania aya ti pakaigapuan ti kaadda ti reggaay. Wenno saan flash flood? Apay a margaay ti sibubukel a bantay? Ti rigatna, datayo ti agaramid iti pakaigapuanna, kalpasanna pabasolen tayo ti Apo. Hustokadi met dayta, intedna kadatayo a pagimbagan wenno pakairanudan tayo dagitoy ngem ti dakesna, abusado tayo, kayat tayo a bukodan ket sige, sobra a kina-agum ti agar-ari. Pukan ditoy pukan idiay ti pamay-an tayo kadagiti kabakiran agingga iti awanen matda a kayona. Ania pay ngay, awanen dagiti ramut ti kayo a mangtengngel iti danum wenno todona. Agtartarusen iti baba ket inton agangayen, layus kas kada flash flood ti mapasamak. Kalpasanna, pabasolen tayo ti Apo, ul-ulay kayo a tattao, puwee!

Alan Kayong Angkuan, kasta pay ta ne narigaten no data met ti madalapus ti bagyo no di maurayen ni Sofing ti pinagatangna a betsin. Babayooo, tsuptsup muahmuah.