Breaking News
 |  |  | 

Opinion Sirmata ken Tagtagainep ni Mang Gusting

Nalpas ti krisis, ania’t sumaruno?

Hellooo, hellooo, naimbag nga oras kadatayo amin kakailian. Addakam manen nga umay maki-abrasa ken makinnistoria kadakayo babaen iti ABN. Kayat dakayo laeng met a kumustaen no ania metten ti mapaspasaranyo ita kadagiti ayan yo… ay apo aya kayong, nakitak ni kumpare Bestre itay bigbigat, sumanuong ta naggango kanun dagitay bunobonda ngem awan met laengen todona. Kasanu ngay daytan ket dandaniin agtapus ti Hulyo.

Nalpas ti krisis idiay Mindanao particular ti Marawi City, Kayong Angkuan. Ania ita ti aramiden ti gobierno? Kas iti nakalap tayo a damag ken nabuya tayo, nangted ti Presidente iti tulong kadagiti soldado ket nalaus ti ragsak dagitoy gapu ta ammona a tagipatgen dagitoy nakasagana a mangibuis iti biagna para iti ingungoten tayo a pagilian.

Kinapudnona, dagitoy koma ti makuna a kadakkelan ti sueldo ken maipangpangruna ta isuda ti nakasagana a mangsalaknib iti pagiliantayo kangrunaan kadatayo nga umili. Ngem, saan ta kasla ketdin maipaspasulida piman. Nakitayo met ti isyu idi ti SAF 44, saan a nagdakkel ti isyu idi ta inun-una pay ti Prediente idi ti napan iti maysa nga inauguration ti maysa a motor company ngem ti mangsabat kadagiti bangkay dagiti polis a natay? Hay Diosko aya ti kasta metten.

Iti sabali a bangir, Kayong Angkuan, panawen manen ti isasangbay dagiti makuna a natural calamity, kasanu ngata kahanda wenno ka-preparado dagiti ahensia ti gobierno iti daytoy a banag? Kumpletoda ngata met laeng iti ramit para iti dumteng a kalamidad? Dagitoy koma ti maysa kadagiti kangrunaan a sanguen ken ipaayan ti gobierno iti atensyon, saan ketdi a sada la agtignay no nalpasen ti didigra. Saan laeng a dagiti pang-rescue koma ti nasken a maisagana… masapul nga adda makuna a contingency plan daytoy kas koma makan, agas ken adda koma dagiti talaga a naituding nga evacuation center tunggal ili wenno barangay nangruna kadagiti makuna a prone area iti kalamidad. Kas iti igid ti baybay, sakaanan ken bakras ti bantay. Ngem, awan met ta kasla bassit laeng daytoy a banag idinto ta biag ti kamkamatem ken nasken a maisalakan ditoy.

Kalpasan ti krisis idiay Mindanao particular iti Marawi City, sapay la koma ta asikasuenda dagiti nadis-place wenno umili a napilitan a nangpanaw kadagiti pagtaenganda iti kabarbaraan ti gubat wenno riribuk. Dayta koma ti ipangpangruna ti gobierno, saan ketdi a no ania la ditan a kaskaso ken ania pay dita. Koma, Kayong Angkuan, kangrunaan wenno umuna iti amin, sakbay ti bukod wenno personal a pakaseknan, unaen dagitoy nga opisyales ti pagimbagan dagiti umili. Laglagipenda koma a dagiti umili ti nangpili kadakuada tapno isuda ti mangibagi kadakuada iti gobierno saan ketdi a ti laeng bagbagida ti ammoda. Oh, ania…may angal! Hahaha, ibagbagami laeng ti pudno ngem, sabagay, tay kunada ngarud no asino kano ti agsida’t sili, isu’t magasangan.

Alan Kayong Angkuan, kasta pay ta ne narigaten no data met ti madalapus ti bagyo no di maurayen ni Sofing ti pinagatangna… babayooo, tsuptsup muahmuah.