Breaking News
     |  |  | 

    Opinion Sirmata ken Tagtagainep ni Mang Gusting

    Nakurang a makabulan laengen, Kayong, Paskuan!

    Hellooo, hellooo, naimbag nga oras kadatayo amin kakailian. Addakam manen nga umay maki-abrasa ken makinnistoria ken makinnisem kadakayo babaen iti ABN. Sapay la koma ta pia ken karadkad latta ti adda kadakayo a sangbayan manen daytoy kolum tayo ket makaipaay kami manen iti ray-aw ken impormasion kadagiti mapaspasamak iti aglawlaw tayo. Ngem koma ket uray kasanu kina-busy ken kinarigat ti panagbiag kadagiti pada a mangur-kuranges a kunada, ditay latta liplipatan wenno liwayan ti agyaman iti Dios a mannakabalin amin kadagiti paraburna kadatayo. Kunada ngarud, bilangen tayo dagiti parabor ti Apo kadatayo saan ketdi a dagiti parikut a sumangbay wenno pannakapaay tayo.

    Daytoy man pay Kayong ta adda istoryaek kenka tapno agkatawa kay met bassit.

    Kaaldawan ti Paskua, simmarungkar ni Atong iti ar-armenna a ni Kolasa. Ti dakesna, adda agar-arem kenkuana a sabali ken maysa a doktor, maysa pay a doktor iti puso, gapu iti dayta, adda napanunotna ni Atong nga aramiden ket…

    Atong: Kolasa, adtoy ti regalok kenka. Anusam la bassiten ti kinanumona… ngem, samunto la koma lukatan, apaman a makatallikudak.
    Kolasa: Ania ngamin daytoy?
    Atong: Kas iti nakunak, lukatamto no makatallikudak.
    Kasta ngarud ti inaramid ni Kolasa. Anian a ragsakna idi makitana a mansanas ti nairegalo kenkuana. Adda nakasurat iti bassit a papel a kunana, “an apple a day, keeps a doktor away”.

    Apowww, dida pay met agkatawa….

    Ala, kasta pay kakayong dayta rinnabak ngem kasapulan tayo dayta…laughter is the best medicine kunadansa itay. Kasdiay kadi pare Jun? Ngem, kasano koma a makakatawa ka ket ne asidegen ti Paskua ngem, lussok pay laeng ti bulsa. Kayatna a sawen, awan pay laeng ti maigatang iti bolabola wenno tay kunada a keso de bola kas kada ham? Ngem, saan kadi a marambakan ti Paskua no awan dagita keso de bola ken ania pay dita nga agkakangina a makan a maidasar iti lamisaan?

    Para kadakami, kakayong, saan a kasapulan basta kumpleto ti pamilia, awan masakit. Kangrunaan ti amin, adda koma ti makuna nga ayat iti kaunggan tayo. Ania kadi ti kaipapanan ti ayat? Iwaksi ti guranggura, para kadakami ket nawada ti pampanunot tayo, kayatmi a sawen a panangibingay kadagiti adda kenka wenno naawatmo a grasia. Sharing ti kayat a sawen, pannangted, tay kunada ngarud nasaysayaat ti mangted ngem ti umaw-awat. Ngem, agsanaang ti kaunggan tayo no adda wenno adu dagiti saan a mangmangan iti tallo a daras iti sanga-aldaw idinto ta adda dagiti nagadu a makan a nakadasar iti lamisaan ti sumagmamano a di payen makmakan, tungpalna maiparakupok iti panganan ti aso.

    No koma ta diay la kabaelan tayo nga ibusen ti intay isagana ngem ti dadduma intay iwaras kadagiti makuna a daksanggasat a kakabsat tayo? Saan ngata a naragragsak ti riknam? Saan ngata a makabang-ar no maparagsakmo ti padam a tao? Nupay kunada, koma, inaldaw ti paskua. Saan ngata a kasta ti kasayaatan a panangrambak tayo iti paskua, ibinglay tayo ti dadduma a naawat tayo a parabor kadagiti mas daksanggasat ngem datayo?

    Ne, ne, ne, Kakayong naimasantayo manen a kunak isu a baliwantayto manen, a. Opsss, aglisika man met iti pagnaak sika Atong, addaka manen a kunak, pasalsali ka a kanayon. Ania manen ti masapulmo aya? Makalag a numero? Paskuan, aggibus manen ti tawen 2017, dikansa pay la napadasan met ti nangabak nga uray saklit laeng, hahaha. Ala man laengen, sige, kalagem man tay adda kukuwatitna a pangkis, hahahaah, ta balatuannakto no mangabakka. Apowww, dakesen…ni Sofing dayta sumungaden nga adda awitna a binalsigen a pagtungo, dakesen. Pagtalawendak sa metten pare Jun, babayooo. Tsuptsup muahmuahhh.

    <