|  |  | 

Opinion Sirmata ken Tagtagainep ni Mang Gusting

Krisis

Halooo! Naimbag nga oras tayo amin kailian, Kayong Angkuan, mag-an tayo kadagiti batug tayo a langit. No dakami met ti kas yo damagen, adtoy nga aggur-uray latta iti manabtuog a kunada bareng no adda met la dumteng a pagsayaatan, hehehee.

No agtultuloy ti makuna a krisis idiay Minadanao particular iti Marawi City, kasta met laeng ti paspasaren dagiti kailian tayo a mannalon iti nagduduma apaset ti pagilian, ngem, saaan a krisis a gulo ngem ketdi, timmapogen ken dandani manen agngalay manen ti bulan ti Hulyo ngem adu pay laeng kadagiti kakabsat tayo a makuna a banuar ken duri ti pagilian ti saan a nakatalon. Masdaaw kayo seguro ania Kayong Angkuan, Ikit Juana, ta kastoy metten ti paspasarentayo. Ti panagbaliw ti panawen. Kasano koma a masolbar daytoy? Kas nakunatayo kadagiti napalpalabas a kolum tayo dakkel ti nagbalin a paset tayo wenno basol tayo no apay a kastoy. Ammoyo, Kailian, saan nga agbalbaliw ti panawen ngem datayo ti nagbalbaliw wenno nangbalbaliw. Kasano met dayta kunayo seguro…

Kas nakunkunatayo, nagabuso tayo. Saan a gapu ta makuna a ti amin nga adda iti rabaw ti daga ket agpaay iti amin a pinarsua dina met kayat a sawen nga aramidentayo lattan ti kaykayat tayo nga uray madadaelen ket sige latta…awan sardayna a panagabuso pay ken Ina Daga. Kasta met kadagiti kabakirantayo, ania ti inaramid dagiti naranggas? Pukan ditoy pukan idiay ti namay-anda para iti bukod a pagimbagan. Tinarikayoda agingga iti naibus dagiti kaykayo nga isuda met ti mangtengtengel iti danum no kasta nga agtodo babaen dagiti ramotda nga isuda met ti mangpangayed ken mangpalamiis iti aglawlaw, saan kadi nga agpayso toy ibagbagak, Kayong?

Agamiris tayo kadi Kayong Angkuan no saan a pudno ti kunak. Dayta ti kangrunaan a rason no apay nga adda ti makunkuna a global warming ken agresulta iti climate change. Nabara unayen ti lubong. Saan laeng a dagita ti rason, Kayong Angkuan. Ti pay kaadun ti dadakkel a pabrika nga agipugso iti asuk iti tangatang nga isu ti mangpabara iti kunkunada nga ozone layer ket addansa payen lussokna isu a sumarot iti kasta unay ti bara ni Apo Init ditoy lubong nga intay pagnanaedan. Malaksid iti dayta, adu metten ti sumadot kadatayo ta uray no nagasideg tay tersina wenno store, agmotor ka pay laeng a mapan. Isu koma pay diay asuk nga ipugso ti tambutso; agasem dayta air pollution ti maysa kadagiti dakkel a rason no apay, Kayong Angkuan. Ti kunam kadi ket dagita laeng ti kangrunaan a pakaigapuan ti ibabara ti panawen?

Daytoy pay ti maysa Ikit Juana, ti adu unay ken ditay maimanihar a basura. Ti rigatna, puor ditoy-puor idiay ti aramidtayo. Dakkel pay a rason dayta air pollution. Maurnong a maurnong ti bara manipud ditoy rabaw ti daga. Ti la unay air pollution ti basura, di rumbeng a puoran, ibelleng iti abot. Mano met laengen ti mangkali iti abut a pagbasuraam ken saan laeng a dayta Ikit Juana, uray dagiti naregreg a bulbulong dagiti muyong mo wenno dagiti mamuna a mihuras wenno kayo nga agbungbunga dita arubayanyo. Saanmo a puoran dagita ngem ketdi urnongem ta igabsuonmo iti puonna ta inton agrupsa, agpaay met laeng a ganagan a sagrapen ta mulam. Patiennak Ikit ta dayta ti nalawag a kinapudno a di mabarusngi.

Opsss, Kayong, Ikit Juana, overtime ta manen a Kayong. Ala, mapanakon ta ne umayen ta binalsig nga iggem ni Sofing a sumungad. Nalipatak tay pagatgatangna a manteka ken itlog. Babayoo, tsuptsup muahmuah!