Author Archives: Pedrito Sanidad

Basol ti chainsaw, kano!

* Iti daytoy nga aldaw, Domingo, Hulio 27, 2014, isu iti pannaksilebrar ti sentenario ti INC, wenno dagitay kabagistayo iti religion nga Iglesia ni Cristo. Maangay ti selebrasion iti Bulacan. Iti patta-patta, agdagup nga lumabes-kumurang nga 10 million ti agatendar iti nasao nga selebrasion iti sentenario ti INC. Kadagiti amin a kabagis wenno kakabsat iti INC, agbiagkayo amin!

* SONA ni apo presidente Benigno C. Aquino III inton Lunes, Hulio 28, ti mabilang iti daytoy nga panagbitlana sigurado nga kalbitenna manen daytoy DAP wenno ti Disbursement Acceleration Program. Adu dagiti mannanao wenno tarabitab nga mangibagbaga nga daytoy kano DAP ket maysa nga klase ti Pork Barrel nga inaramat ti Malacanang a pinangpasuksok kadagiti senador tapno agbutos da iti kayat ti president a ma-impeach ni dati a Chief Justice Renato Corona, nga kalpasanna dagitoy nga naipasuksok ket imbulsa laeng dagitoy nga opisiales iti bukodda a pagsayaatan! Babaen ti daytoy, iti met laeng legalidad wenno constitutionalidad daytoy ti natameng a mismo ti Korte Suprema? Ti saludsod, adda kadi pagbatbatayan iti linteg ti DAP? Kas naammuantayo kadagiti media a kakabsat iti radio, telebision ken kadagiti pagiwarnak, daytoy kano ket binukel ti Malacanang ti DAP babaen iti rekomendasion ni budget sekretario Butch Abad tapno napardas iti pannakausar ti pondo daytoy kadagiti proyekto ti gobierno a para iti pagsayaatan ti publico. Isu daytoy tay kinunkuna ni presidente Aquino nga “savings” manipud kadagiti nadumaduma nga departamento ti gobierno. Daytoy tay kunada nga napagtitiponda nga pondo nga sobra wenno saan nga nausar dagiti dadduma nga ahensia. Kanayonnan ditoy dagiti pondo nga mairuar oray saan nga nakaprograma tapno mapadakkelda laeng ti “saving”. Sigurado nga dagullitena manen iti agtultuloy nga pananglablabanna iti Korte Suprema gapu iti panangideklara ti Korte Suprema nga adda paset ti DAP ti kunana nga “unconstitutional”. Mabalin nga iti daytoy a SONA na, mailawlawagna amin dagiti dadduma pay a programa nga pagsayaatan dagiti umili. Maawis ngarud ti amin nga makipagdengngeg iti SONA ni president Benigno C. Aquino III!

* Iti daytoy umay a bulan ti Agosto maiwaragawag kadagiti amin nga umili nga atay bangus ken tilapia nga ikan ket adda panagkurkurang nga mailako iti merkado. Sigurado nga ipanginada manen iti gatadna!

* Kalbitek man no asino ti kangatuan nga mangimatmaton ditoy Burnham Park ta no asino kadagitay dua a security guard ti nangbilin nga ikandadoda day ruangan a landok a sumbrekan dagiti tattao nga aggapu iti Harrison Road nga umuneg ditoy Jadewell Parking area (dati) ken dagiti aggapu iti Burnham Drive nga magna iti abay ti Ganza Restaurant a mapan iti Harrison Road. Nagdakes ket iti kananakem dagitoy a parsua ta sinerraanda daytoy a ruangan nga pagnaan dagiti tattao. Ania ket ti rigat dagitoy senior citizen nga sumagpat iti kinabite nga pader iti beddeng toy Ganza Restaurant ken itoy dati a Jadewell Parking area! Kunak pay ketdi nga dagiti pulis iti utek iti pannakasera itoy a ruangan. Ngamen idi malpas tay rescue exhibition ti Fire Department, kamalmanna kinandaduan da metten. Maasi kayo kadagiti passers nga agsagpat iti kinabeti nga pader wenno kasla da la baboy nga umususok iti nawayaan nga abot a kadena toy ruangan a bato! Kaskay la agpampanunot a monamon! Yah! Agbain kayo met ah!

* Apay ngamin a pabasolenda ni Diputado Nick Aliping ket awan met napukan a kayo iti ayan iti loteda sadiay Cabuyao. Maysa pay, saan da met a nakita nga isu ti nagpukan? Ngem ne, isu met iti imameg dagiti kontraktor nga isu iti nagpatrabaho iti kalsada nga dumanon iti asideg iti agdua ektaria a dagana idiay Cabuyao. Ania ken asino dagiti nagpukan kadagiti kayo? Baka pabasulen da ti chainsaw! Naks! Ania met dayta!

Saan a naingkalintegan a panunot

* Ania ngata ti turongen ti panangkastigo ni president Benigno Aquino III tapno saanna a respetuen ti maysa nga paset ti Disbursement Acceleration Program (DAP) nga unconstitutional? Kayatna nga ipakita wenno saanna nga ikkan iti respeto ti desision ti Korte Suprema? Apay ngata? Sigurado nga adda gapuna! Ania ngata didiay? Gapu ngata ta appointed position laeng dagitoy hues wenno justices? Maysa nga rason daytoy tapno ikkatenna ti respetona kadagiti disision ti Korte Suprema. Baka ipagarup ti presidente nga iti kinangatona ta presidente ngarud ket mabalinnan nga ipayatpayat ti linteg wenno desision ti korte wenno iti uray ania nga korte.

Maipalagip nga kangatuan a korte ti Korte Suprema. No aniaman ti agbalin a desision dagiti chief justices ditoy ket “final”, awan ti appeal a madawat wenno pakpakaasi. Para kaniak, iti saan a mangrispeto iti desision nga aggapu iti Korte Suprema ket addaan iti “abnormal thinking!”

Inton Lunes, Hulio 21, 2014, agpanes dagiti amin nga hues ken dagiti amin nga empleado nga adda iti ibabaenda. Agdagup dagitoy iti 29,000 iti intero a Pilipinas. Ipanesanda iti panangipayat-payat iti ehekutibo iti nababa a panangkitada kadagiti adda iti korte. Nagbantada pay dagitoy nga mapan kadagiti kalkalsada nga agprotesta tapno ipakitada iti pananglabanda iti kaawan respeto ti presidente maipanggep iti desision ti Korte Suprema iti maysa nga paset ti DAP nga unconstitutional. Ipakitada nga no iti executive ken legislative a sanga ti gobierno ket saan a marespeto ti judiciary. Laban!

Solid North, agbiag!

* Itay napan a lawas, naimatangak iti panangkurobda iti Kayang Extension Road, adda iti nagbaetan iti City Hall-Baguio City court ken iti Baguio City Elementary School. Masdaawka no apay a sukatanda iti baro manen a kongkreto a kalsada, nakapinpintas pay laeng. No adda man saan a nasayaat, tay gutterna laeng. No ita a kanito ket mapanka, tay nabati a kongkreto nga kagudduana isu iti mangipaneknek a napintas pay laeng! Ngem no apay a sinukatandan, narigat nga amirisen! Maymaysa iti ammok a gapuna. Dakes a kababalin dagiti adda iti highways (Baguio City District Office), ta national road ngamin. Nakalawlawag nga panangkugtar-likod dagitoy a taga-highways kadagiti umili, ngamin kunak daytoy ta kuarta dagiti umili ti mapagbibingayanda nga maibulsa. Apay, segun iti bukodko a patta-patta 60-40% ti panaganida. Ti 60% isu daytay SOP ket tay 40% isu daytay labor-material nga mausar iti trabaho! Nakalawlawag a sub-standard ti pannakatrabahona. Pupuotenyo, ta sigurado nga kalpasan iti lima a tawen (sumurok-kumurang) sukatandanto manen. Ania nga klase iti imahi dagitoy nga adda iti gobierno (highways)? Kuniber wenno kurapsion, di kadi? Nalinis a panagtakaw!

* Kumustaek met daytay kakaisuna a diputadotayo iti siudad iti Baguio. Ania dagitay agtataroptop nga pammabasolda kenkuana ken dagitay tallo a kontraktor nga nangdadael kadagiti nakaparsuaan? Pinapatayda dagitay kaykayo-muyong a dinalapusda iti nasurok a dua a kilometro nga nangiwayatanda iti kalsada! Ania ngata met iti nagbanagan tay daga nga nasubsub-naiwalin? Narga-ay ket naigabor! Ket sigun iti damag, awan kano met iti permiso iti ekskabision ken panagputed kadagiti kaykayo-muyong nga dinadaelda? Segun iti damag, nagdimanda ti Benguet Provincial Forestry, ti Baguio Water District ken ti DENR-CAR! “Violations of Presidential Decree 705 or the Forestry Code of the Philippines, wenno napasengkedan a watershed and forest reservation on July 8, 1940, babaen iti Proclamation No. 581. “Nadagsen a nagbasulan!” Iti nakaskasdaaw, sadino iti ayan dagitay forest rangers guard, idi madama iti ekskabasion ken panagpukanda kadagiti kaykayo? Dagiti barangay opisiales met iti Cabuyao, tay madaydayaw a chairman ayanda met? Imposible met nga saanda lattan nga mangngegan dagiti daranodor dagiti equipment wenno dagiti ikkis dagiti chainsaw? No kunaenda nga awan iti nangnangegda, adda ngarud gapuna, natapalan dagiti lapayagda iti Banawe Rice Terraces? No dadduma ngamin ket kasdiay, di kasdiay a talagan! Asino koma iti alilaoenda, dagitay tangad a baboy? Iti daytoy a napasamak a kaso, sapay koma ta aggunay tay ngipen iti linteg tapno saan a mapukaw iti panagtalek dagiti umili iti gobierno tayo, abusta kasla met la drama-regodon ti mapaspasamaken iti kaso dagitay tallo a senadortayo! Tunukuan absueltoda aminen! Ania to ngata manen iti next showing??? Yahh!

* Iti dumna iti amianan, adu metten iti maragragsakan ta agsubli kano iti Malacanang tay anak ti agila? Solid North kunadaman!

Olopan ener kay la?

* Itay napalabas a tawen, iti panagsasaruno dagiti kalamidad a demteng ditoy Pilipinas adu dagiti nadadael a pinagayan iti amianan a Luzon, iti rehion 3 ken 4 agingga iti Visayas ken Mindanao. Kas kuna iti National Food Authority adda panagkurang iti supply iti bagas iti daytoy a tawen ket dimmawatda iti palubos ken ni Presidente Aquino iti panagangkat manen ti bagas iti sabali a nasion. Manipud pay idi presidente ni Gloria Arroyo agangangkaten ti Pilipinas iti bagas iti Vietnam nga agingga ita! Pagdaksanna adu dagiti damag nga mangibaba iti kalidad iti opisina ti NFA gapu kadagitoy nga panag-ang-angkat iti bagas. Pinaburan ni presidente iti dawat ti NFA nga mangalada iti 100,000 a tonelada nga bagas iti Vietnam! Agasem ngay dayta. Mano manen nga over price daytan? Apo, ket bumsog manen dagiti bulsa dagitay mannibrong nga adda iti National Food Authority. Daytoy koma nga banag iti ikkan met iti hustisia iti gobierno ngem tulengdan sa met? Wenno agintutulengda? Takawen ti kwarta iti gobierno babaen iti panang-swetikda iti panagangkat pay met ngarud iti bagas? Sobra nga talaga nga kuniber iti araramiden dagiti amin a sanga iti gobierno! Kadakesan a panagtakaw iti mangtakaw iti kinabaknang iti ili ta daytoy ket kuarta dagiti umili nga agpaay iti ili! Sigurado da manen iti over pricing ti 100,000 a tonelada a bagas nga angkatenda! Isu nga awan iti panagsarday ti aktibidad a takaw ta tay kunadan: no tinatakaw a banag iti paggapuan ti ipakanmo iti annakmo, inton dumteng ti panawen, agtatakaw met dagitoy. Isu nga umadu nga umadu dagiti agtatakaw. Naipagaladsan daytoy nga aramid maika-pito a bilin ti Dios: “Saanka nga agtaktakaw!”

* Itay bigat kimmuyogak kadagiti taga DENR – Land Management Services a napan nangbiripika iti survey a reklamo dagiti agindeg iti barangay P. Burgos, ditoy siudad ti Baguio. Iti umuna nga gundaway nagamammo kamin ken ni apo Barangay Captain Bustos. Nataraki a lumakay metten. Maysa met gayam nga mangbasbasa iti kolumtayo. Isu daytay kapitan iti P. Burgos barangay a kanayonko nga kalbitin ken riingin. Tatta kalbitik manen ta iti barangayna adda gayam operasion iti sugal nga ireklamo dagitay bumarangay ta naariwawada kano. Adda pay nakaarariwawa kano nga agsinsinungbat ta napukawan kano iti walo ribu a pesos ket ipabpabasol na nga isu kano iti nangala. Nagistayan nagpinnugotda kano. Isu dayta iti pangrugyan wenno puon iti apa wenno riri no maminsan. Isu nga apo kapitan Bustos kalbiten ka manen tapno maisardeng koma daytoy illegal nga aktibidad. Amanganto no isu daytoy iti mangkidag kenka iti nadalus a naganmo iti barangaymo nga idaldaulwam! Nakariingkan apo ket ammom no ania dagiti mapaspasamak iti bukodmo a barangay! Pauna laeng dayta apo! Mangriknaka!

* Olopan, ayanyon? Nakar yo! Natan la kabaleyan! Pano abalang kay la! Agriingkayo!

Ngimmina ti gasolina, pati bawang ngimmina met, ania ti koneksionna?

* Idi kanikadua nga aldaw simmuko ni Senador Bong Revilla iti PNP. Nakulong. Simmuko ken nakulong gapu iti saan nga umno a pannakausar tay PDAF na, wenno Priority Development Assessment Fund. Idi petsa 9 ti Hunio, 2014, naikkan iti prebelihio nga agbitla iti maipabpabasol kenkuana nga kaso. Imbagana nga awan iti ammona kadagitoy a banag. Naklaatkano no apay nga nairaman iti naganna iti listaan ni Napoles, ti babai nga akusado iti 10 billion pesos scam money, manipud iti PDAF! Idi kanikaddua nga aldaw, simmuko met ni Sen. Jinggoy Estrada ken ni mayor ti Manila Joseph Estrada nga amana. Kinuyog ni Mayor Estrada iti anakna iti PNP Headquarters iti Camp Crame iti Quezon City. Kas ken ni Senador Ramon Revilla Jr., pareho nga kaso met iti naipabpabasol kenkuanan. Daytoy iti maikaddua a daras a pannakakolongna iti PNP. Maipalagip nga idi 2001, kadduana nga nakulong ni Erap wenno iti amana nga ni nagpresidente Joseph Estrada. Kunada idi nga nairaman iti plunder a kaso gapu iti kinakurang kadagiti ebidensia. Ket iti daydi a panawen, nakarruar met laeng. Ni presidente Joseph Estrada ti nakulong ngem naparol wenno napakawan idi panawen ni presidente Gloria Arroyo.

* Saan pay nga simmuko ni Senador Juan Ponce Enrile. Kas kada Senador Ramon Revilla Jr., kenni Senador Jinggoy Estrada, plunder met ti kaso na. Gapu iti makatao a rason, kasla hospital arrest iti pagtungpalanna. Gapu ta lakayen iti tawenna nga 90, makulong babaen iti pannakataripatona a naimbag, amangan ta saankanon a kabaelan pay iti salun-atna. Kasta iti naibaga ni Presidente Benigno Aquino III idi pinagsaludsudan dagiti media. Siguro, kasla tumaltaliaw ni presidente iti naimbag a nakem ken ni Senador Juan Ponce Enrile ta no saan nga iti panangtraidor ni Enrile iti daydi presidente Ferdinand Marcos, saan nga nakapagpresidente daydi Corazon C. Aquino nga inana, ni Senador Juan Ponce Enrile ti sekretario iti depensa national ni presidente Marcos iti daydi a panawen ti martial law! No aniaman iti pagbanagan dagitoy a kaso iti panagtakaw sapay koma ta adalen a naimbag ti Sandigan Bayan iti pudpudno nga napasamak. Daytoy ngatan iti kadakkelan a kaso iti panagtakaw iti daytoy nga basingkawel! Sapay koma ta nalinis ken maadalda nga naimbag daytoy a kaso tapno maikkan iti husto a pannusa no nagbasolda!

* Itay napan a lawas, naingato manen iti gatad ti gasolina! P1.30 ti nainayon iti maysa nga litro, idinto nga no rollback kunada, no saan a sangapulo a pesos, lima. Ania metten! Mamati ka met nga P40 ti maysa nga kilo ti bawang tattan?

* Malagipko, anian ti napasamak kadagitay ulopan? Daytoy daytay assosasion dagiti taga-Pangasinan ditoy Baguio. Awan sa metten ti pannakariingna daytoy a gunglo! Kalbitek ngarud ti biang dagitay pundador! Unbangong-kayo kabaleyan! Natan la!